Am Samstigmorge hämer ois all sogar pünktlich! in Winterthur troffe. Det simmer denn id Büssli igstige und Richtig Bodesee losgfahre. In Krüzlinge hämer oisi Büssli denn ufeme Parkplatz platziert und ois fürs erste Training umzoge. Zerscht isch en Multisprint ufem Programm gstande. Nach zwei spannende Routewahle und emne Korridor OL, simer bim letzte Teil direkt am See, mit vergrösserete Charte imne chline Park am Poste finde oder mängisch au im Laub am sueche gsi. Nach dem fätzige Training hämer zrugg ufem Parkplatz oise Zmittag verspise und sind denn langsam i die nächsti Stadt losgfahre. Det hämer es intensivs Training mit Gegnerkontakt gmacht, die einte mit churze Hose und T-Shirt, die andere mit gfüetterete Hose und Jagge. Am Schluss händ bi dene spannende Gegnerkontäkt aber alli warm gha, und die meiste sind mal ine Sackgass oder dur e unsichtbari Muur grennt. Nach dene zwei asträngende Trainings sind all no guet go uslaufe, bevor mer denn zum Pfadiheim in Bischofszell kurvet sind. Dete acho händ all es Zimmer gfunde und sind go dusche. Nach em Dusche händ die einte scho mal kochet und die Andere usgwertet. De Znacht isch superfein gsi und mir händ bewise, dass mer au selber guet chönd choche. Nachem Abwäsche ischs mit em Uswerte witergange. Miteme super Kahoot hämer oisi Routewahle chöne vergliche. Nach dem hämer no zwei witeri gspielt, wos denn au no Pünkt gäh hät. Wo denn all erschöpft vom viele Kahoot spiele gsi sind, simer all müed i oisi Better gsunke. Am nächste Morge hämer nachem Zmorge grad afah putze, dämit mer möglichst schnell zum nächste Training fahre chön. Das isch in Heiden gsi. Sobald mer det acho sind, hämer ois umzoge und sind go ilaufe. STraining hät miteme Uswendig OL gstartet, aschlüssend hämer ois i Gruppe ufteilt und en Gegnerkontakt OL mit vielne näche Pöste gmacht, bevors denn interessanti Runners Choice gäh hät . Mer hät e Uswahl zwüsched vier Routene gha und am Schluss hät sich die eint oder Ander chli meh glohnt. Mir händ ois schnell wieder umzoge, wils sehr chalt gsi isch und denn no Zmittag gässe. Fürs letzte Training simer uf Herisau gfahre. Det häts chum simer acho afah schneie. DMotivation isch bi vielne ned allzu gross gsi und dÜberwindig isch gross gsi vom warme Büssli use in Schneesturm zgah. Aber doch hät mer denn die einte in churzes Hose gseh. DBahn hät jede gforderet und die meiste sind scho bim zweite Poste leider obe, anstatt une ade Unterfüherig gstande und so halt scho de erst Umweg händ müsse mache. Schlussendlich isches en super Abschluss gsi, vomne intensive und spannende Sprint Kazu. Sobald all wieder warm azoge und id Büssli ghocket sind, hämer ois vonenand verabschiedet und sind zrugg uf Winterthur gfahre.

Bigna und Mira